Gróðurfar

Viðey er afar gróð­ur­sæl og var öldum saman talin ein besta bújörð lands­ins. Þar sjást enn ummerki túna og hlað­inna garða sem héldu búpen­ingi frá slægj­unni. Til að auka rými til rækt­unar voru grafnir skurðir í eyj­unni til að ræsa fram mýrar. Núna eru í Viðey 156 háplöntur, en það er um þriðj­ungur af flóru landsins.

Skúli Magnússon gerði ýmsar rækt­un­ar­tilraunir í eyj­unni sem gengu mis­vel og má þar nefna ræktun á kart­öflum, káli, tób­aki og trjá­gróðri. Hann rækt­aði einnig kúmen sem vex þar í veg­köntum. Það er jafnan full­þroskað í ágúst og er þá dökkt á lit.

Fuglalíf

Margar elstu heim­ildir um Viðey tengj­ast fjöl­breyttu fugla­lífi og höfðu Viðeyingar öldum saman mikla dún­tekju. Æðar­fugli er aftur tekið að fjölga í Viðey eftir fækkun á fyrri hluta 20. aldar. Hann er nú orð­inn algeng­asti fugl­inn í Viðey og verpir beggja vegna við Þórs­nesið en þar er eyjan friðuð yfir varp­tím­ann. Aðrar algengar fugla­teg­undir í Viðey eru fýll, grá­gæs, hrossa­gaukur, send­lingur og tjaldur. Fyrir fáeinum árum tók jaðrakan einnig að verpa í eyj­unni en alls verpa tæp­lega 30 fugla­teg­undir í Viðey. Eyjan er því fuglap­ara­dís og líf­leg­astar eru tjarn­irnar á Eiðinu.

Við biðjum gesti að sýna fugla­líf­inu til­lits­semi, fara eftir göngu­leiðum og hrófla alls ekki við hreiðrum. 

 

 

Jarðfræði

Fyrir tveimur millj­ónum ára var í Viðey virk eld­stöð. Viðeyjareldstöðin, og í eyj­unni er elsta berg borg­ar­lands­ins. Fyrir um 12–13 þús­und árum bráðn­aði jök­u­lís­inn, sjáv­ar­borð hækk­aði og eyjan hvarf undir yfir­borð sjávar. En sjáv­ar­borðið lækk­aði aftur og fyrir 9–10 þús­und árum reis Viðey úr sæ.

Viðey er um 1,6 km2 að stærð og skipt­ist í tvo hluta, Heimaey og Vesturey, sem tengj­ast með Eiðinu. Austurhluti Heimaeyjar kall­ast Austurey. Meðfram strönd eyj­unnar sjást stór­brotnar berg­mynd­anir og er vel þess virði að gefa sér góðan tíma í fjör­unni. Einnig skal bent á feg­urð stuðla­bergs­ins, bæði í Virkishöfðanum og Eiðisbjarginu. Viðey á stöð­ugt undir högg að sækja vegna ágangs sjávar og sjást þess skýr merki við Kríusand og Þórsnes.

Vinsamlega sýnið sér­staka aðgát við háa sjávarhamra.