Á hverju vori kemur mikill fjöldi nemenda í grunnskólum Reykjavíkur og nágrannasveitarfélaga í heimsókn til Viðeyjar. Við leggjum okkur fram um að taka vel á móti þeim og gera heimsóknina sem eftirminnilegasta.
Viðeyjarnaust stendur öllum gestum Viðeyjar opið meðan á áætlunarsiglingum stendur og því geta hópar átt von á að deila Naustinu með öðrum gestum sem koma til Viðeyjar.
Kennurum og leiðbeinendum sem hafa hug á að koma með nemendur sína í heimsókn til Viðeyjar er bent á að hafa samband við verkefnastjóra Viðeyjar, Svanbjörgu H. Einarsdóttur í síma 693 1440 eða senda fyrirspurn á netfangið: svanbjorg.h.einarsdottir@reykjavik.is
Verkefnastjóri tekur á móti hópum og veitir eilitla leiðsögn sem sniðin er að þörfum hvers hóps fyrir sig. Hægt er að velja ýmsar gönguleiðir sem henta hópnum, skoða Viðeyjarkirkju, leika á leiksvæði við Viðeyjarstofu og fara í fjöruna, skoða Friðarsúluna og borða síðan nesti eða hádegisverð í Viðeyjarnausti. Leiðsögnin og öll aðstaða er skólahópum að kostnaðarlausu en ferðir þarf að panta hjá Eldingu/Hvalaskoðun. Rekstrarstjóri Viðeyjarferða hjá Eldingu er Guðlaugur Ottesen, netfang: gulli@elding.is
Viðeyjarnaust rúmar um 100 manns og þar er salernisaðstaða og vísir að eldhúsi. Fyrir utan Viðeyjarnaust er myndarlegt kolagrill sem nýtur mikilla vinsælda. Mikil stemning myndast þegar pylsum er skellt á grillið eftir göngutúrinn. Umsjónarmönnum er bent á að hafa með allt sem þarf til grillsins, þ.e.a.s. allan mat og meðlæti, kol, grilltangir, diska, glös og þess háttar.