Hefur þú komið í gamla skólahúsið í Viðey? Hefur þú séð Friðarsúluna í Viðey? Á námskeiðinu nema börnin land, upplifa sögu og náttúru eyjarinnar í gegnum skapandi og listrænt starf innan- og utandyra. 

Þau fá að kynnast gamla skólahúsinu í Viðey sem var hluti af þorpinu sem hvarf. Í nýuppgerðu skólahúsinu er sérlega góð aðstaða til tilrauna og rannsókna á gersemum náttúru eyjunnar sem verða notaðar sem efniviður í myndlistarsköpun og leiki. Unnið verður sérstaklega með friðarupplifun í gegnum listir, leiki, markvissa útiveru og hreyfingu. Markmið námskeiðsins er að hver og einn þátttakandi fái að njóta sín á eigin forsendum undir handleiðslu fagfólks.

Leitast verður við að skapa vingjarnlegt umhverfi fyrir börnin án snjalltækja, þar sem þau munu skapa nýjar minningar í hópi jafningja. 

Fjöldi barna er takmarkaður á námskeiðinu, að lágmarki 12 börn og að hámarki 15 börn. 

Tímasetning námskeiða:
Námskeið 1: 10. – 14. júní
Námskeið 2: 18. – 21. júní (4 dagar)
Námskeið 3: 24. – 28. júní

Kennarar námskeiðsins taka á móti börnunum við bryggjuna á Skarfabakka og ferjan siglir af stað stundvíslega kl. 09:00 á hverjum morgni. Þess vegna er gott að mæta allavega 15 mínútur fyrr, svo það gefist tími til að spjalla við kennara ef eitthvað er. Ferjan kemur til baka á Skarfabakka kl. 15:45. 

Praktísk atriði: Börnin þurfa að hafa með sér nesti fyrir daginn (hádegismat, morgun- og síðdegishressingu), skjólgóðan fatnað og góða skó. Gott er að hafa nesti og aukafatnað í bakpoka því það er um 20-30 mínútna gangur frá bryggjunni í Viðey og í skólahúsið þar sem námskeiðið fer að stórum hluta fram. 

Heimsókn í Viðey felur í sér töluverða útiveru og gott er að hafa í huga að hvassara getur verið í eynni en á landi. Göngustígar liggja um graslendi sem getur verið blautt og suma dagana verður farið í fjöru. Einnig er nauðsynlegt að börnin komi með inniskó þar sem gólf skólahússins er gróft. Síðasti frestur til að hætta við skráningu og fá reikning felldan niður er tveimur vikum fyrir upphafsdag námskeiðs. 

Verð: 
40.000 kr. fyrir 5-daga námskeið 
34.000 kr. fyrir 4-daga námskeið 
20% afsláttur fyrir systkini 

Skráning á námskeiðin fer fram á sumar.vala.is. 

Þar er hægt að leita að námskeiðinu með því að skrifa “Viðey” í reit fyrir heiti námskeiðs. 

Kennarar: 
Þrír kennarar taka þátt í Viðey-Friðey í sumar. 
Misjafnt er hver kennir hverju sinni en kennarar eru: Ása Helga Ragnarsdóttir aðjúnkt í kennslufærði leiklistar og sérfræðingur í staðartengdri útimenntun, Björk Bjarnadóttir umhverfis-þjóðfræðingur sjá um kennslu á námskeiðunum og bætist Fríða Kristjánsdóttir kennari af myndlistarbraut við hópinn vikuna 18. - 21. júní.

Um kennara námskeiðsins: 

Ása Helga Ragnarsdóttir er leikari að mennt og hefur verið með í Viðey-Friðey frá upphafi. Hún lauk námi frá Kennaraháskóla Íslands árið 1996 og fór síðan í framhaldsnám til Bretlands og lauk þaðan meistaragráðu í listum með áherslu á leiklist í kennslu. Hún hefur síðan kennt við Menntavísindasvið Háskóla íslands. Sem leiklistarkennari hefur Ása lagt áherslu á að kenna kennaranemum að nota leiklist í námi barna. Hún hefur haft sköpun að leiðarljósi í sinni vinnu. Undanfarin sumur hefur Ása kennt á námskeiði um staðartengda útimenntun á vegum Menntavísindasviðs Háskóla Íslands þar sem nemendur upplifa náttúruna með öllum sínum skynfærum, vinna með sögur þeirra staða sem þeir fara á og tengja listir við upplifun sína. Ása var á árunum 1982-85 umsjónamaður Stundarinnar okkar í sjónvarpinu. 

Björk Bjarnadóttir, umhverfis-þjóðfræðingur, er með B.A próf í þjóðfræði frá Háskóla Íslands og M.A í umhverfisfræðum frá sama skóla. Hluta af mastersnáminu tók hún í Kanada við Háskólann í Manitoba. Hún vinnur nú sem kennari og aðstoðarkokkur i Waldorfskólanum í Lækjarbotnum. Björk hefur verið með sagnastundir og leiðsagnir á Borgarsögusafni til fjölda ára. Draugagöngur og Jónsmessunæturgöngur á Árbæjarsafni, þjóðsögur við hafið sem og kúmengöngur í Viðey. Á Landnámssýningunni Aðalstræti hefur hún sagt frá rótum Hrekkjavökunnar en hún er hennar sérstaka gæluverkefni sem Björk stúderar í frístundum, mjög forn, áhugaverð hátíð sem dreifist æ hraðar um heiminn. Björk vann með frumbyggjum í óbyggðum Kanada á árunum 2005-2010. Var þar að læra um menningu, sögu og siði frumbyggja. Plöntur og fuglar eru einnig áhugamál Bjarkar sem og lífræn ræktun á tómötum og salati inni í Mosfellsdal.

Fríða Kristjánsdóttir er kennari af myndlistarbraut og hefur 20 ára reynslu af kennslu, bæði í Danmörku og Íslandi. Hún kennir nú í Engjaskóla, hefur verið með útival í skólanum sínum og kennt mikið úti. Eins hefur hún unnið sem leiðsögumaður fyrir ferðafólk, mest í Reykjavík. Fríða hefur mikinn áhuga á náttúru og umhverfi, bæði til að lifa og vera í og til að auðga andann, til dæmis gegnum umhverfislist. Hún tók þátt í Viðey-Friðey 2022 og verður aftur með í sumar. Fríða er yfir sig hrifin af Viðey og hefur tekið námskeiðið Staðartengd útimenntun á Menntavísindasviði HÍ sem Ása kennir ásamt Jakob Frímanni Þorsteinssyni. 

Viðey-Friðey er samstarfsverkefni Borgarsögusafns og Listasafns Reykjavíkur og er byggt á grunni sem hlaut styrk úr Barnamenningarsjóði.

Have you visited the old school building in Viðey? Have you seen the Imagine Peace Tower in Viðey?

VIÐEY FRIÐEY - a summer course for 8-9 year old kids

Spennandi vikunámskeið fyrir 8-9 ára börn (fædd 2015 og 2016) í friðsælu náttúruperlunni Viðey þar sem sköpunargleðin verður virkjuð.

VIÐEY FRIÐEY - sumarnámskeið fyrir 8-9 ára börn

Fræðsla

Smiðja

Daníel Perez Eðvarðsson│Maðurinn sem svaf eins og flamengódansari 

Ljósmyndasafn

Stuart Richardson│Undiralda

Við erum jörðin – við erum vatnið │Heimir Freyr Hlöðversson

Sjóminjasafn

Árbæjarsafn

Fornar rætur Árbæjar

Fiskur & fólk - sjósókn í 150 ár

Viðey

Friðarsúlan

Áfangar│Richard Serra

Af sýningunni Neyzlan- Reykjavík á 20. öld.

Neyzlan – Reykjavík á 20. öld

Börn að leik í kassabílum á Árbæjarsafni.

Kerruöldin

Komdu að leika!

Aðalstræti

#### Um staðinn

Í Viðey eru einnig staðsett ein merkustu útilistaverk borgarinnar, Friðarsúla Yoko Ono og umhverfislistaverkið Áfangar eftir Richard Serra.
Viðey er sannkölluð náttúruperla í borgarlandinu, með djúpar sögulegar rætur og menningarlegt vægi. Þetta gerir eyjuna að einstökum og heillandi áfangastað til ánægju, útivistar og í ævintýraleit. Þar er líka hægt að komast í kyrrð frá annríki hversdagsins og sækja andlega endurnæringu. 

Þú kemst til Viðeyjar með því að fara í **5-10 mínútna siglingu** um sundin blá með samstarfsaðilum okkar hjá [Eldingu](lhttps://elding.is/is/ferdir/videy).  

Mikilvægt er að við sýnum nærgætni í umgengni við Viðey svo hægt sé að koma og njóta náttúru hennar aftur og aftur. Í Viðey er að finna kletta, skurði og tjarnir sem geta verið varhugaverð. Við bendum á að börn eru á ábyrgð foreldra eða annarra forráðamanna í eyjunni.  


Hópur fólks fyrir utan Viðeyjarstofu, um 1902.

Viðey er afar gróðursæl og var öldum saman talin ein besta bújörð landsins. Þar bjuggu menntamenn og áhrifamenn í íslensku samfélagi og þar sjást enn ummerki túna og hlaðinna garða. Eyjan skiptist í tvo hluta, Heimaey og Vesturey, sem tengjast með Eiðinu. Á austurhluta Heimaeyjar er að finna rústir þorps frá tímum Milljónafélagsins þegar útgerð og mannlíf stóð þar í miklum blóma. Nú standa þar eftir aðeins tvær byggingar og rústir einar sem minna á liðna tíma. Á Heimaey standa ein elstu hús landsins, Viðeyjarkirkja og Viðeyjarstofa.  Eyjan er jafnframt útivistarsvæði í eigu Reykvíkinga og öllum er velkomið að koma og njóta kyrrðar og náttúru eyjarinnar.

Viðey er um 1,7 km2 að stærð  og rís hæst 32 metra yfir sjávarmáli. Meðfram strönd eyjarinnar sjást stórbrotnar bergmyndanir. Fegurð stuðlabergsins í Virkishöfðanum og Eiðisbjarginu er sérstaklega mikil. Æðarfugl er algengasti fuglinn í Viðey og verpir hann beggja vegna við Þórsnesið, en þar er eyjan friðuð yfir varptímann, á tímabilinu 1. maí – 1. júlí. Aðrar algengar fuglategundir í eyjunni eru fýll, grágæs, hrossagaukur, sendlingur og tjaldur en alls verpa þar um 30 fuglategundir. 

## Ferjuáætlun

Vetur (1. sept. – 14. maí): Eingöngu siglt um helgar.
Sumar (15. maí – 31. ágúst).

Nánari upplýsingar hjá [Eldingu](https://elding.is/is/ferdir/videy)

#### Áletraðir steinar

Á Vestureyjunni má finna þrjá jarðfasta steina með áletrunum. Ekki er i öllum tilvikum vitað 
hverjir voru þar að verki eða hver tilgangurinn var.




#### Áfangar

Í tengslum við Listahátíð 1990 var listaverkið Áfangar eftir bandaríska myndhöggvarann Richard Serra (f. 1939) reist á Vestureyjunni en eigandi þess er Listasafn Reykjavíkur. Serra er einn áhrifamesti myndhöggvari samtímans og er verkið gjöf hans til íslensku þjóðarinnar.
Áfangar er umhverfislistaverk sem leggur undir sig alla Vesturey og setur sterkan svip á ásýnd hennar og umhverfi. Listaverkið er úr stuðlabergi og vísar þannig til jarðsögu eyjarinnar og undirstrikar um leið órjúfanleg tengsl þess við umhverfi sitt.

Verkið samanstendur af níu súlnapörum úr stuðlabergi sem ramma inn nærliggjandi kennileiti eða áfangastaði. Súlnapörin eru þannig uppsett að önnur súlan stendur í níu metra hæð yfir sjó en hin stendur tíu metrum yfir sjávarmáli. Súlurnar eru þó jafnar að ofan því sú sem lægra stendur er fjórir metrar á hæð en hin hærri aðeins þrír metrar og jöfn hæð þeirra því þrettán metrar yfir sjávarmáli. Bilið á milli súlnanna ræðst svo af halla landsins sem þær standa á. Öll stuðlabergspörin eru sýnileg af hæsta punkti eyjunnar, sem er átján metrar yfir sjávarmáli.Listaverkið Áfangar ber mörg einkenni minimalískrar myndlistar; margfalda endurtekningu sömu formanna, öxullausa samhverfu symmetríu, stærðfræðilega reglu og beinskeytt áhrif á nánasta umhverfi. Öll þessi atriði er gott að hafa í huga þegar verkið er skoðað, en þó eru þau engin forsenda þess að umhverfis og listar verði notið á Vesturey. Stuðlabergspörin eru heillandi áningarstaðir þar sem list og náttúra renna saman í eina heild.


#### Friðarsúlan í Viðey

Friðarsúlan í Viðey er hugarfóstur myndlistarmannsins, tónlistarmannsins og friðarsinnans Yoko Ono og er hugsuð sem leiðarljós fyrir heimsfrið. Verkið er í formi „óskabrunns“, en upp úr honum stígur há og mikil ljóssúla. Orðin „Hugsa sér frið“ eru grafin í brunninn á 24 tungumálum. Ljóssúlan er samansett úr mismunandi geislum sem sameinast í einu sterku ljósi. Sex ljósgeislanna fara lárétt um göng á palli í kring um brunninn og er endurkastað upp á við með speglum. Þéttleiki ljóssins, sem stafar frá súlunni, er háður sífelldum breytingum á ögnum í andrúmsloftinu sem hegða sér í takt þá við margbreytilega veðráttu sem einkennir Ísland.

„Ég vona að friðarsúlan muni lýsa upp heitar óskir um heimsfrið hvaðanæva að úr veröldinni 
og veita hvatningu, innblástur og samstöðu í heimi þar sem nú ríkir ótti og ringulreið. 
Sameinumst um að gera friðsæla veröld að veruleika.“
– Yoko Ono

„Hugsa sér allt fólkið lifa lífinu í friði.“
- John Lennon
 
Frá því á síðustu öld hefur Yoko Ono safnað óskum fólks hvaðanæva að úr heiminum, sem 
hluta af venslaverki hennar Óskatré, sem hefur verið sýnt í söfnum og menningarmiðstöðvum 
víða um heim. Þessar óskir eru geymdar í tímahylkjum við friðarsúlu hennar í Viðey. 

Yoko Ono býður þér að bæta við óskum á www.imaginepeace.com eða með því að senda póst til:

IMAGINE PEACE TOWER
PO Box 1009
121 Reykjavík
Ísland

#### Maríulíkneski

Árið 2000 var reist Maríulíkneski á Kvennagönguhól til minningar um 1000 ára afmæli 
kristnitöku á Íslandi, en María mey var verndardýrlingur Viðeyjarklausturs.


Viðburðir

Sögueyjan

Viðey 

Siglt daglega frá 15. maí - 31. ágúst. 

Fyrsta sigling til Viðeyjar 10:15. Síðasta sigling frá Viðey 18:30.


Eingöngu siglt um helgar frá 1. sept - 14.maí.  

Fullorðnir 2.100 kr.

Börn 7 - 17 ára 1.050 kr.

Börn 0 - 6 ára Ókeypis í fylgd fullorðinna

Eldri borgarar, 67 + og öryrkjar 1.890 kr.

Handhafar Menningarkorts Reykjavíkur 10% afsláttur

Menningarkort 67+ 2.350

Borgarsögusafn hefur umsjón með menningarstarfssemi í Viðey.  

videy@reykjavik.is 

Sími: 411 6360



Bókaðu hér á síðunni. 



**Aðrar fyrirspurnir:**
- hopar.borgarsogusafn@reykjavik.is

Viðey

Sögu­eyjan

Viðburðir

VIÐEY FRIÐEY - sumarnámskeið fyrir 8-9 ára börn

VIÐEY FRIÐEY - sumarnámskeið fyrir 8-9 ára börn

Sögueyjan